ჩატარების ადგილი: ონლაინ-სივრცე, ZOOM პლატფორმა

კონფერენციაზე დასწრების მსურველებს, გთხოვთ, გაიაროთ რეგისტრაცია ამ ბმულის მეშვეობით. რეგისტრაციის გავლის შემდეგ, თქვენს ელ-ფოსტაზე მიიღებთ კონფერენციაზე დასწრების ბმულს და პროგრამას.
კონფერენციაზე უზრუნველყოფილი იქნება სინქრონული თარგმანი ქართულ-ინგლისურ ენებზე.

კონფერენციის თემატიკა:

• მუზეუმები პანდემიის პირობებში და პოსტ-პანდემიურ პერიოდში;
• რა „გაკვეთილი მიიღეს“ მუზეუმებმა კრიზისის პერიოდში? იქცა თუ არა იგი შესაძლებლობად, გარკვეულწილად გადაფასდეს მუზეუმების საქმიანობა საზოგადოებისა და პლანეტარული კეთილდღეობის მიმართულებით?
• ნდობის ფაქტორი: როგორ მოიპოვონ მუზეუმებმა  საზოგადოების ნდობა ხელახლა?
• მუზეუმები და მდგარდი განვითარების მიზნები (SDG)
• მოუწევთ თუ არა მუზეუმებს საგამოფენო კონცეფციებისა და თემების შეცვლა პოსტ-პანდემიურ პერიოდში?
• კრიზისი, როგორც საშუალება, რომელიც კვლავ გვახსენებს, რომ მუზეუმები ეკონომიკის ნაწილია;
• ცნება „წარმატებული მუზეუმის“ განმარტება პანდემიის პერიოდში და შემდეგ;
• მუზეუმები და ციფრული სამყარო პანდემიის პერიოდში - საუკეთესო პრაქტიკის მაგალითები.

სპიკერები: პიტერ კელერი (ICOM-ის გენერალური დირექტორი), ჯულია პაგელი (NEMO-ს გენერალური მდივანი), შერონ ჰილი (დიდი ბრიტანეთის მუზეუმების ასოციაციის დირექტორი), ლევან ხარატიშვილი (საქართველოს განათლების, მეცნიერების, კულტურისა და სპორტის მინისტრის მოადგილე), დიანა პარდუე (ICOM-ის კატასტროფების რისკების მართვის კომიტეტის პრეზიდენტი, აშშ), ინგა ქარაია (ICOM საქართველო, პრეზიდენტი), კორინ ვეგენერი (სმითსონის ინსტიტუტის კულტურული მემკვიდრეობის გადარჩენის დეპარტამენტის დირექტორი, აშშ), მარია ქრისტინა ვანინი (SoluzioniMuseali-ის დირექტორი, ევროპა ნოსტრას ექსპერტი, იტალია), ანტონიო კარლოს რუიზ სორია (Economia Creativa, დამფუძნებელი და დირექტორი, ესპანეთი), ტრილცე ნავარეტე (ერასმუსის უნივერსიტეტის პროფესორი, ჰოლანდია), დარკო ბაბიჩი (ICOM ICTOP-ის პრეზიდენტი, ზაგრების უნივერსიტეტის პროფესორი, ხორვატია), ალექსანდერ დებონო (მალტის პრეზიდენტის მრჩეველი კულტურის საკითხებში, მალტის უნივერსიტეტის პროფესორი), დავით ლორთქიფანიძე (საქართველოს ეროვნული მუზეუმის გენერალური დირექტორი), ვენქე მადერბაჰერი (ICOM CECA ევროპის კოორდინატორი, ორჰუსის მოსგარდის მუზეუმის განათლების და კულტურის დეპარტამენტის დირექტორი, დანია), ნიკოლოზ ანთიძე (საქართველოს კულტურული მემკვიდრეობის დაცვის ეროვნული სააგენტოს გენერალური დირექტორი), ნილუფერ იაზდხასტი (მუზეუმის კურატორი, Museum Matters დამფუძნებელი, ირანი), ნინო სანადირაძე (თბილისის მუზეუმების გაერთიანების გენერალური დირექტორი), შირინ მელიქოვა (აზერბაიჯანის ხალიჩების მუზეუმის დირექტორი, ICOM აზერბაიჯანის პრეზიდენტი), არტიომ სილკინი (სვიაჟსკის ქალაქ-კუნძულის მუზეუმ-ნაკრძალის დირექტორი), ანი ავაგიანი (ICOM სომხეთის პრეზიდენტი, ROCHEMP-ის დირექტორი).

კონფერენციის შესახებ:
კოვიდ 19-ის პანდემია ერთგვარ გამოწვევად იქცა ყველა სფეროსთვის, თუმცა,  გლობალური კრიზისი უპრეცედენტო გავლენას ახდენს და სავარაუდოდ, მომავალშიც მოახდენს მთელი მსოფლიოს მუზეუმებზე.
აღსანიშნავია, რომ სხვა კრიზისულ შემთხვევაში მუზეუმები არ დახურულა და მათი სივრცეები ხელმისაწვდომი იყო საზოგადოებისთვის შეხვედრებისა და სხვადასხვა თემებზე აზრთა გაცვლა-გამოცვლისთვის. კორონავირუსის პანდემიის დროს კი, მთელ მსოფლიოში ათასობით მუზეუმი დაიკეტა და მათი ხელახლა გახსნის პროცესი დღეს ეტაპობრივად მიმდინარეობს.
პარადოქსულად ჟღერს, მაგრამ ფაქტია, რომ იმ პერიოდში, როცა მუზეუმები დაკეტილი იყო, ისინი ასე  ხელმისაწვდომი არასდროს ყოფილა. ვინაიდან, ონლაინ-სივრცეში ვირტუალური ტურების, ვიდეო-ლექციების, დისკუსიებისა თუ სხვა აქტივობათა დემონსტრირების რაოდენობა და მასშტაბი განუზომლად და ყოველდღიურად იზრდებოდა. COVID-19-ის პანდემიამ თითქოს ერთგვარი ციფრული „აფეთქება“ გამოიწვია და მცირე მასშტაბის მუზეუმებმაც კი, მათ შორის რეგიონებსა და პერიფერიებში, უახლესი ტექნოლოგიების გარეშეც შეძლეს აუდიტორიისთვის საკუთარ კოლექციებზე ინფორმაციის მიწოდება, თუნდაც ისეთი მარტივი საშუალებით, როგორიცაა მაგალითად, ჰეშთეგებით მოთხრობილი ისტორია და ა.შ. სამუზეუმო სფერომ მიიღო გამოწვევა, ემოქმედა დაჩქარებული ტემპით, ბევრმა მუზეუმმა გააცნობიერა, თუ რას ნიშნავს მათთვის აუდიტორია და რომ შესწევთ ძალა, გაუმკლავდნენ კრიზისულ ეტაპს, მაშინ, როცა შეიძლებოდა პირიქითაც მომხდარიყო.
ICOM-ის მიერ ჩატარდა გლობალური კვლევა სამუზეუმო სფეროში პანდემიის გავლენაზე, რის შედეგადაც გაირკვა, რომ მსოფლიოს მუზეუმების 80% აპირებს მაქსიმალურად შეამციროს თავისი პროგრამები, 30% გეგმავს თანამშრომელთა რაოდენობის შემცირებას, ხოლო მუზეუმების თანამშრომელთა 20%-მა უკვე დაკარგა სამსახური, 7,3% დისტანციურად აგრძელებდა მუშაობას პანდემიის პერიოდში. მუზეუმების 13% ფიქრობს, რომ შესაძლოა ხელახლა ვერ გაიხსნას, ხოლო 19% არ არის დარწმუნებული, თუ როგორ გააგრძელებს ფუნქციონირებას. NEMO-ს (ევროპის სამუზეუმო ორგანიზაციების ქსელი) მიერ ჩატარებული კვლევის თანახმად კი, პანდემიის გამო, მაგალითად, სტედელიკის მუზეუმმა და რეიკსმუზეუმმა (ამსტერდამი) თვეში 2.5 მლნ. ზარალი განიცადეს.  

კონფერენციის ერთი სესია დაეთმობა პროექტ BE MUSEUMER-ის ბენეფიციართა (საქართველო, სომხეთი, აზერბაიჯანი) და თბილისის სახელმწიფო სამხატვრო აკადემიის მუზეოლოგიის სამაგისტრო პროგრამის სტუდენტთა მოხსენებებს (10-10 წუთი).